بحبك يا شيخ إمام

إنهارده .. مبسوط أنا شويات

اممم .. لازم أحكي الحكاية م الأول

هو شريط .. شريط كاسيت .. واخد مساحة عشر سنين من عمري

سنة أولى ثانوي بالنسبالي انا ومصطفى كانت السنة اللي اكتشفنا فيها ان ودننا ليها وظيفة تانية غير اننا نسمع بيها هرد الناس اللي حوالينا

سنة أولى ثانوي .. كانت سنة اكتشاف الموسيقى بالنسبالنا .. ومن بعدها التأريخ أكيد اختلف

ف السنة دي اكتشفنا فيروز وعبد الوهاب وام كلثوم ومحمد منير وبيتهوفن وموتسارت وشتراوس

لغاية ما جه الاكتشاف الكبير جدا والخاص جدا .. الشيخ امام

وده ليه قصة مختلفة

مصطفى ليه اخ اسمه احمد كان بيدرس طب وراح تونس تبع برنامج شباب الجامعات ..من ضمن الحاجات اللي رجع بيها شريط للشيخ امام

تخيلوا ؟.. عمري مشفت هنا ف مصر شريط كاسيت للشيخ امام .. واستغربت جدا لما احمد قالنا انهم ف تونس بيعشقوه

لما تسمع الحفلة اللي متسجلة ع الشريط واللي كانت ف تونس والشيخ امام بيقول

يا عرب ف كل مصر

اسمعوا صوت شعب مصر

.

.

.

لغاية ميقول

والمعاد هيكون ف مصر

والتوانسة بيصقفوا بهستريا مش هيبقى ف ايدك غير انك تتعجب

الشريط ده مصطفى صاحبي قفشه من اخوه بعد مكتشفناه .. وبعد كده قفشته انا من مصطفى

وفضل معايا لغاية تانية جامعة تقريبا .. رفيق مستمر .. من اولى ثانوي

وانا باذاكر التاريخ الممل والفيزيا الخنيقة

وثانوية عامة وانا منفض للمذاكرة

عدى على الكاسيت الناشونال السماعة الواحدة العتيق .. وغير بعدها تلت اجهزة كاسيت وهو زي مهو

صامد

لغاية مضاع ف تانية جامعة تقريبا .. انهارده بس لقيته .. حاسس اني لقيت حتة مني كنت ضايعة

آه .. هو انا قلت اني باحب الشيخ امام قوي؟

ماظنش إني محتاج أقولها

....................................

يا عرب .. يا عرب

يا عرب في اي مصر

اسمعوا .. اسمعوا صوت شعب مصر

احفظوا لمصر المكان

واحنا ع العهد اللي كان

مصر اوفى من الزمان

وانتوا عارفين شعب مصر

اللي خانوا العهد بينا

واستباحوا كل حاجة

واستهانوا بالعروبة

واستكانوا للخواجة

مستحيل هيكونوا منا

احنا حاجة وهما حاجة

هما باعوا الجلابية

والوطن والبندقية

واحنا اصحاب القضية احنا ما بنبيعش مصر

يطلع الدجال بزيفه

يملا وادي النيل ضباب

ينزل الجلاد بسيفه

يطلع الموت والخراب

يطول الليل زي كيفه

الصباح له الف باب

واحنا بوصلتنا ف ايدينا

متخافوش م الليل علينا

مهما غبتوا عن عنينا انتوا جوه ف قلب مصر

آه آه آآآآآآآآآه

سينا ولا يافا ولا حيفا ولا دير ياسين

اسألوا الشمس اللي هاله ع اللي صحيوا مبدرين

يزرعوها نور وغلة دول جدودنا ولا مين؟

حقنا وحتما يعاد

بس لو بانت سعاد

والبيان ده له معاد

والمعاد هيكون ف مصر

المعاد هيكون ف مصر

المعاد هيكون ف مصر

...........................................................

الفلاحين بيغيروا الكتاني بالكاكي

ويغيروا الكاكي بتوب الدم

وبيزرعوك يا قطن ويا السناكي

وبيزرعوك يا قمح سارية علم

وبيدخلوكي يا حرب فحم الحريقة

وبيزرعوكي يا مصر شمس الحقيقة

وانتي ميدان الحرب

سينا البداية

انتي جنينة الصلب والنصر راية

انتي البكا والغلب

انتي الرحاية

انتي البارود والحب ..و الحرب جايه

غنوا التلامذة الصبح للحرية

الفلاحين ضموا غيطان القمح

رفعوا الرايات

ف الفجر متندية

رفعوا السنابل بنادق

عبوا البنادق بارود

الرملة قادت حرايق

والنار ف دم الجنود

والحرب زي جناين الحرية

مهرة ومالهاش حدود

والحرب لسه ف أول السكة

اتفضلي يا مصر

اتفضلي يا مصر بالحرب ضد اليليل

ضد الجوع وضد القهر وضد الدمار

الجهاد .. الجهاد .. الجهاااااااد

واتسلحي للحرب بالحرية

واتفتحي الوردة بدم ونار

يا مصر يا مصر يا مصر .. الجهاد .. الجهاد .. الجهاااااااااااد

واتجمعي من ألف صرخة ضحكة

والحرب لسه ف أول السكة

الحرب

الحرب لسه ف أول السكة

الأغنيتين لعمنا الشيخ إمام

كلمات أحمد فؤاد نجم